नुवाकोट । लिखु गाँउपालिकाको अध्यक्ष ध्रुव श्रेष्ठले गाँउपालिका मार्फत पालिकाबासी युवालाई शिक्षा, सिप र रोजगारको लागी प्राथमिकता सहित उल्लेख्यनीय काम गर्दै आइरहेको बताउनुभएको छ ।
सुुरक्षित आप्रबासन (सामी) कार्यक्रममा सहभागी हुदै अध्यक्ष ध्रुव श्रेष्ठले युवाहरुलाई उच्च शिक्षा अध्ययन, माग र आवश्यकताको आधारमा सिप विकास तालिम र स्थानीयस्तरमा नै रोजगारको प्रबन्ध मिलाउदै आएकाले आगामी दिनमा पनि यही अभियानलाई निरन्तरता दिने बताउनुभयो ।
२१ हप्तासम्म चलेको वित्तीय साक्षरता तथा मनोसामाजिक परामर्श कक्षाको समापन कार्यक्रममा उहाँले लिखु गाँउपालिकाको प्रगति र कार्यसम्पादनलाई मापन गर्ने आधारहरु अन्तरगत बित्त आयोग, एफआरएमा नुवाकोट जिल्लामा नै पहिलो भएको स्मरण गराउदै गाँउको विकासको लागी गाँउकै युवाहरुबीच सहकार्य र हातेमालो गर्दै अघि बढ्नुपर्ने भन्दै युवाहरुको साथमा गाँउपालिका रहेको बताउनुभयो ।
गाँउको विकासको लागी पूर्वाधार निर्मार्ण, शिक्षा, स्वास्थ्य, सामाजिक विकास, खानेपानी, सिचाईकुलो लगायतका विकासका गतिविधिमा पालिकाले उल्लेख्य काम गर्दै आएकाले बाँकी दिनमा थप आवश्यक रहेको सिप र तालिम उपलब्ध गराउने अध्यक्ष ध्रुव श्रेष्ठले प्रतिबद्धता जनाउनुभयो ।
अहिले पनि सिलाईबुनाई, ब्युटिपार्लर लगायतका तालिम निःशुल्क सञ्चालन गरिरहेकाले सिप सिकेका युवाहरुलाई आफ्नो सिपलाई ब्यबहारमा अर्थात स्वरोजगार र रोजगारसंग जोडिन आह्वान गर्नुभयो ।
उहाँले लिखु गाँउपालिकाले पालिकाबासीको चाहना र समृद्धि लिखु बनाउने लक्ष्य पूरा गर्नको लागी कर्मचारीलाई साथ लिएर जनप्रतिनिधिहरुले अहोरात्र सिपाहीको रुपमा खटिदै आएकाले त्यसमा जनताबाट पनि सकारात्मक सहयोगको अपेक्षा गर्नुभयो ।
पालिकाको नयाँ भवन निर्माणमा ढिलो हुदाँ अन्य धेरै राम्रा कामलाई पनि ओझेलमा राखेर अनावश्यक टिकाटिप्पणी हुने गरेकाले नयाँ भवनको निर्माण पनि छिट्टै निर्माणको चरणमा अघि बढ्ने विश्वास व्यक्त गर्नुभयो । नयाँ भवन निर्माणको लागी स्थान छनोटका सम्बन्धमा असहयोग भएकाले त्यसलाई पनि समाधान गरेर अघि बढ्न आफू सफल हुने अध्यक्ष ध्रुव श्रेष्ठले विश्वास व्यक्त गर्नुभयो ।
स्वीस सरकारको सहयोगमा लिखु गाँउपालिका मार्फत सञ्चालनमा रहेको सामी परियोजना अन्तरगत २१ हप्तासम्म सञ्चालन गरिएको वित्तीय साक्षरता तथा मनोसामाजिक परामर्श कक्षाको बुधबार एकैदिन लिखु गाँउपालिका वडा नं २ को खानीगाउँ र लिखु गाँउपालिका वडा नं १ को बाह्रविसेमा रहेका दुई समूहको कक्षाको समापन गरिएको छ ।
उक्त अवसरमा वडा नं १ का अध्यक्ष तथा पालिकको प्रवक्ता नरहरी पाण्डे, २ का अध्यक्ष प्रेम बहादुर थापामगर, २ नं वडा सदस्य सञ्जिब लामिछाने लगायतको सहभागिता रहेको थियो ।
कार्यक्रममा सहभागी भएकालाई पालिका अध्यक्ष ध्रुव श्रेष्ठले प्रमाणपत्र प्रदान गर्दै वित्तीय साक्षरता तथा मनोसामाजिक परामर्श कक्षामा सिकेको सिप र प्राप्त भएको ज्ञानलाई आफू मात्र नभई घरपरिवार सहित समाजमा समेत परिवर्तन ल्याउनको लागी सुझाब दिनुभयो ।
लिखु–१ स्थित बाह्रबिसेमा र लिखु–२ स्थित खानीगाँउमा रहेका दुई समूहलाई गत मंसिर १४ गतेदेखि चैत २९ गतेसम्म बित्तिय साक्षरता र मनोसामाजिक परामर्श कक्षाको सहजिकरण वित्तीय साक्षरता सहजकर्ता दिपेन्द्र लामीछाने र मनोसामाजिक परामर्शकर्ता गोमा जमकट्टेलले गर्नुभएको थियो ।
सहभागी हुनुभएका महिलाहरुलाई व्यबहार परिवर्तन, परिवार व्यवस्थापन, बालबालिकाहरुको भविष्य, व्यवस्थित परिवार निर्माणको विधि, बित्तिय लक्ष्य निर्धारण, बजेटको परिचय र महत्व, पारिवारिक बजेट निर्माणको अभ्यास, सुरक्षित विप्रेषण, बैदेशिक रोजगारी र घरेलु हिंसा, बचतको परिचय र महत्व, बचत गर्ने प्रचलित तरिका तथा यसका विधि, उद्यम र उद्यमशिलता, व्यवसायको छनौट प्रक्रिया, व्यावसायिक योजनाको अभ्यास, लाञ्छना र भेदभाव, ऋण परिचय तथा ऋण व्यवस्थापन, जोखिम र त्यसको असर एंव न्युनीकरणको उपाय, सुचना प्रविधि तथा विद्युतीय कारोबार र सुखि भविष्यका लागि वित्तीय अनुशासनको विषय जानकारी गराएको वित्तीय साक्षरता सहजकर्ता दिपेन्द्र लामीछाने जानकारी दिनुभयो ।
२१ हप्ते कक्षा लिएका सहभागीले अहिले दैनिक घर सञ्चालनमा हुने गरेको खर्च अन्तरगत अनावश्यक खर्चको कटौती गर्दै बचत गर्ने बानीको विकास भएको, परिवारका सदस्यले वैदेशिक रोजगारमा गएर पठाएको रकम (रेमिट्यान्स)को खर्च र अम्दानीलाई चुस्त रुपमा राख्न सक्ने भएको बताएका छन् ।
