नुवाकोट । बेलकोटगढी नगरपालिकाले निर्माण व्यावसायी र उपभोक्ता समितिसंग घुस रकम माग्ने इञ्जिनियर रामशरण अधिकारीलाई सेवाबाट हटाएको छ ।
पूर्वाधार विकासको शाखा प्रमुख अधिकारीले निर्माण व्यावसायीसंग रकम माग गरेको अडियो मिडियालाई समेत प्राप्त भएको थियो ।
उक्त अडियो माथी नगरपालिकाले छानबिन सहित उनको कार्यसम्पादनका सम्बन्धमा सोधेको स्पष्टिकरणमा सन्तोषजनक नभएको पाइएसगैँ उनलाई असार ३ गतेदेखि प्राविधिक शाखा प्रमुखको जिम्मेवारीबाट हटाएको सूचना असार ४ गते सार्वजनिक गरिएको छ ।
लामो समयदेखि नगरपालिकाको पूर्वाधार शाखा प्रमुखको जिम्मेवारीमा रहेका अधिकारीले उपभोक्ता समिति र निर्माण व्यावसायीसंग निर्बाध रुपमा घुस रकम माग्ने र नदिएमा भुक्तानी रोक्ने चेतावनी दिदै आर्थिक अनियमितता गर्दै आइरहेको गुनासो आएको थियो ।
चौतर्फी रुपमा गुनासो आएपछि नगरप्रमुख जगतबहादुर गुरुङ, उपप्रमुख शिवप्रसाद दाहाल सहित नगरपालिकाको टिमले उनलाई स्पष्टिकरण सोधेको थियो ।
उनीमाथी उठेका प्रश्नमा उनले दिएको जवाफ चित्तबुझ्दो नभएपछि हटाएको जानकारी बरिष्ठ शाखा प्रमुख दिपक थिङले उनलाई (रामशरण अधिकारी)लाई दिएको पत्रमा भनिएको छ ।
उनलाई शाखा प्रमुखको जिम्मेवारी मुक्त गरेसगैँ नगरको प्राविधिक शाखा प्रमुखको जिम्मेवारी सव–इञ्जिनियर अभिषेक चन्दलाई दिइएको छ ।
