नुवाकोट । प्रथम विदुर मेयर अन्तर वडास्तरीय क्रिकेट प्रतियोगिता’को उपाधिको लागी वडा नं ३ र ४ बीच प्रतिस्पर्धा हुने भएको छ ।
विदुर नगरपालिकाको आयोजना र नुवाकोट क्रिकेट संघको प्राविधिक सहयोगमा सञ्चालन भएको प्रतियोगिताको उपाधिको लागी शनिबार वडा नं ३ र ४ प्रतिस्पर्धा गर्न लागेको हो ।
फाइनल प्रवेशको लागी वडा नं ३ ले वडा नं १ लाई १० विकेटले हराएको थियो । वडा नं १ ले दिएको ८३ रनको लक्ष्य वडा नं ३ को लागी राजेश रिमालले २१ बलमा ४२ रन र पवन राईले २० बलमा ३१ रन बनाएको थियो ।
यस्तै, वडा नं ४ ले फाइनल प्रवेशको लागी वडा नं ७ लाई ३ विकेटले हराएको हो । वडा नं ७ ले दिएको १०९ रनको लक्ष्य वडा नं ४ ले सात विकेटको क्षतिमा पूरा गर्दै फाइनल प्रवेश गरेको हो ।
फाइनल खेल शनिबार दिनको १ बजे तल्लो पिपलटार स्थित खेल मैदानमा हुने आयोजक विदुर नगरपालिका खेलकुद विकास समितिका संयोजक अच्युतराज महन्त गिरीले जानकारी दिनुभयो ।
