आसन्न प्रतिनिधिसभा सदस्य निर्वाचनको सरगर्मी देशभर बढ्दो छ। यसै सन्दर्भमा मोरङ क्षेत्र नम्बर ४ यतिबेला निकै चर्चामा छ। यस क्षेत्रबाट नेपाली कांग्रेसका महामन्त्री गुरु घिमिरे चुनावी मैदानमा छन् । विद्यार्थी राजनीतिबाट उदाएका घिमिरे वैचारिक र प्रखर वक्ताका रूपमा चिनिन्छन् ।

निर्वाचनको मिति नजिकिँदै गर्दा मोरङ-४ को चुनावी माहोल कस्तो छ? घरदैलोमा पुग्दा जनताका गुनासा र अपेक्षा के-कस्ता छन्? नेपाली कांग्रेसभित्रको आन्तरिक गुटबन्दीले यसपटक कस्तो प्रभाव पारेको छ? र, पछिल्लो समय चर्चामा आएका नयाँ राजनीतिक दलको लहरलाई उनले कसरी हेरिरहेका छन् ? 

यिनै समसामयिक विषयमा केन्द्रित रहेर गुरु घिमिरेसँग गरिएको कुराकानीको सम्पादित अंशः

निर्वाचन प्रचार-प्रसार कसरी चलिरहेको छ ?

प्रचार-प्रसारको अवधि र सीमा अब निकै खुम्चिँदै गएको छ। हामी अहिले अधिकतम मतदातासँग भेट्ने, संवाद गर्ने, हाम्रा मुद्दाहरू बताउने र उहाँहरूका आग्रहहरू सुन्दै प्रतिबद्धता व्यक्त गर्ने क्रममा छौँ। यो क्षेत्रको भूगोल निकै ठूलो छ। सबै भूभागमा पुग्न निकै मुस्किल छ। भूभागमा त पुगिएला, तर यहाँका झण्डै सवा लाख मतदाता सबैसँग प्रत्यक्ष पुग्न समयको अभावले निकै कठिन भइरहेको छ। तैपनि हामी जतिसक्दो अधिकतम मतदातासम्म पुग्ने प्रयास गरिरहेका छौँ।