बाढीबाट झन्डै डेढ लाख नागरिक प्रत्यक्ष प्रभावित

बाढीबाट झन्डै डेढ लाख नागरिक प्रत्यक्ष प्रभावित

काठमडौँ । भोटेकोशी र त्रिशूली नदीमा गएको भदौ १० मा आएको बाढीबाट रसुवा, नुवाकोट, धादिङलगायतका जिल्लामा झन्डै डेढ लाख नागरिक प्रत्यक्षरूपमा प्रभावित भएका सरकारकाे प्रारम्भिक आँकलन छ ।

विनाशकारी बाढीबाट डेढ लाख नागरिक प्रत्यक्षरूपमा प्रभावित भएका शुरुआती आँकलन रहेको स्वास्थ्य तथा खाद्य स्वच्छता मन्त्रालयले जनाएको छ ।

सिंहदरबारमा आज बसेको प्रतिनिधिसभाअन्तर्गतको शिक्षा, स्वास्थ्य तथा सूचना प्रविधि समितिको बैठकमा स्वास्थ्य मन्त्रालयका सचिव डा. विकास देवकोटाले विभिन्न संयन्त्रमार्फत सङ्कलित तथ्याङ्कका आधारमा प्रभावित नागरिकको प्रारम्भिक सङ्ख्या आँकलन गरेको जानकारी दिनुभयो ।

उहाँले प्रभावित क्षेत्रबाट उद्धार गरी होल्डिङ सेन्टरमा राखिएका २५ जनामा झाडापखाला भएको भेटिएको पनि बताउनुभयो । उहाँका अनुसार स्वास्थ्यसम्बन्धी अरू समस्या अहिलेसम्म देखा परेकाे छैन ।

सचिव देवकाेटाले भौगोलिक अवस्था र तापक्रमअनुसार भवन निर्माणको अवधारणा अघि बढाउनुपर्ने र मन्त्रालयले त्यससम्बन्धी योजनाको तयारी गरिरहेको उल्लेख गर्नुभयाे । पुनर्स्थापना र पुनर्निमाणका लागि ‘क्लाइमेट रेजिलेन्स स्ट्रक्चर’ सहितको योजना निर्माण गरिरहेको उहाँकाे भनाइ छ ।