काठमाडौँ ।  रसुवाको भोटेकोशी नदीमा यही भदौ १० गते आएको भीषण बाढीका कारण ५ जिल्लाका १५ वटा पालिकामा ठूलो सङ्ख्यामा घरधुरी तथा जनसङ्ख्या प्रभावित भएका छन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढी प्रभावित क्षेत्रमा रसुवा, नुवाकोट, धादिङ, गोरखा र चितवनका १५ पालिका रहेका छन् । बाढीबाट १६ हजार एक सय १० घरधुरीका ६४ हजार तीन सय ३५ जना प्रभावित भएका छन् । प्रत्यक्ष रूपमा बाढीबाट सात हजार पाँच सय ७० घरधुरी प्रभावित भएका छन् ।

प्रभावित जनसङ्ख्यामध्ये १६ हजार सात सय ६९ पुरुष र १६ हजार एक सय ९२ महिला रहेका छन् । रसुवामा चार पालिकाका १६ वटा वडा बाढीबाट प्रभावित भएका छन् । गोसाइँकुण्ड गाउँपालिकाका वडा नम्बर १, २, ३, ५ र ६ प्रभावित भएका छन् ।

यहाँ बाढीका कारण एक हजार तीन सय तीन घर तथा भवनमा क्षति पुगेको छ । ती क्षेत्रमा रहेका एक हजार चार सय ४४ घरधुरीका पाँच हजार सात सय ४३ जना प्रभावित भएका छन् । कालिका गाउँपालिका वडा नम्बर १ प्रभावित भएको छ ।

त्यहाँ एक सय १४ भवनमा क्षति पुगेको छ भने एक सय १९ घरधुरीका चार सय ९१ जना प्रभावित भएका छन् । त्यस्तै, आमाछोदिङ्मो गाउँपालिकाका वडा नम्बर १, २, ४ र ५ प्रभावित भएका छन् । यहाँ ७६ भवनमा क्षति पुगेको छ ।