बाघखोर । बेलकोटगढी नगरपालिकाको सबै वडा पूर्ण खोप सुनिश्चित भएका छन् । नगरपालिकाले सोमबार आयोजित कार्यक्रममा नगरमा रहेका सबै १३ वटै वडालाई पूर्ण खोप सुनिश्चित भएको प्रमाणपत्र प्रदान गरिएको हो ।

नगरपालिकाअन्तर्गत सम्बन्धित स्वास्थ्य संस्थामार्फत जन्मेदेखि १५ महिनाभित्रका ३६५ जना बालबालिकाले नियमित खोप सेवा लिइरहेको र १६ देखि २३ महिनासम्मका ३४८ जना बालबालिकाले पूर्ण खोप प्राप्त गरेका छन् । आवश्यक सम्पूर्ण प्रक्रिया पूरा गरी वडा खोप समन्वय समितिबाट सिफारिस भएपछि वडाहरूलाई पूर्ण खोप सुनिश्चित रहेको नगरप्रमुख जगतबहादुर गुरुङले घोषणा गर्नुभयो ।

बेलकोटगढी नगरपालिकास्तरीय खोप समन्वय समितिका अध्यक्ष तथा नगरप्रमुख जगतबहादुर गुरुङले वडाहरूलाई प्रमाणपत्र हस्तान्तरण गर्दै बालबालिकाको स्वास्थ्य सुरक्षामा खोप अभियान प्रभावकारी बनेको बताउनुभयो ।

कार्यक्रममा नगर उपप्रमुख शिवप्रसाद दाहाल, स्वास्थ्य शाखा प्रमुख सत्येन्द्र शाह, विभिन्न वडाध्यक्षहरू, विभिन्न स्वास्थ्य संस्थाका प्रमुख तथा प्रतिनिधिहरूको सहभागिता रहेको थियो ।

स्वास्थ्य शाखा प्रमुख सत्येन्द्र शाहका अनुसार अब बेलकोटगढी पालिकालाई नै पूर्ण खोप सुनिश्चिततारहेको प्रमाणिकरणका लागि जिल्ला खोप समन्वय समितिमा पनि सिफारिस गरिएको छ ।