चीनतर्फका दुई मुख्य नाका पहिरोका कारण ठप्प

चीनतर्फका दुई मुख्य नाका पहिरोका कारण ठप्प

काठमाडौँ । बाढी, पहिरोका कारण सडक अवरुद्ध हुँदा चीनतर्फका मुख्य व्यापारिक नाकाहरू अवरुद्ध बनेका छन् ।

मुख्य नाका रुसुवागढी केही दिनदेखि पूर्णरूपमा अवरुद्ध छ । त्रिशूली–मैलुङ–स्याफ्रुबेसी सडकमा पहिरो खसेका कारण सडक पूर्ण अवरुद्ध हुँदा नाका ठप्प बनेको जिल्ला प्रहरी कार्यालय रसुवाका प्रवक्ता एवम् प्रहरी निरीक्षक डिल्लीराम सापकोटाले जानकारी दिनुभयो । उहाँका अनुसार पहिरो झरिरहेकोले तत्काल बाटो खुलाउन सम्भव छैन ।

यस्तै चीनतर्फको दोस्रो प्रमुख व्यापारिक नाका तातोपानी झन्डै साढे एक महिनादेखि ठप्प छ । इको र लिपिङलगायत सडकका धेरै ठाउँमा पहिरो रहेको र नाका छेवैको लिपिङको पहिरोमा तल आधार नै नभेटिने गरी सडकको स्तर बगाएको हुनाले सडक सञ्चालनका लागि लामै समय लाग्न सक्ने जिल्ला प्रशासन कार्यालय सिन्धुपाल्चोकले जनाएको छ ।

अहिले तातोपानी नाकाअन्तर्गत चीनमा भन्सार गराइएका र नेपाल भित्रिसकेका दुवै खाले कन्टेनरहरू अलपत्र अवस्थामा रहेका छन् ।

नेपाल हिमालय सीमापार वाणिज्य सङ्घका अध्यक्ष रामहरि कार्कीका अनुसार चीनतर्फ भन्सार गराइसकिएका गाडीहरू फर्काएर रसुवा वा कोरलातिर लैजाने अवस्था पनि नहुँदा ८५ वटाभन्दा धेरै गाडी अड्किएका छन् ।

सामान्यतः तातोपानी, रसुवालगायतका उत्तरी नाका चल्दा दुई देखि तीन हप्ताभित्रै चीनको जुनसुकै ठाउँबाट काठमाण्डौ सामान ल्याउन सक्ने तर समुद्री मार्ग हुँदै भारतबाट ल्याउँदा डेढ महिनासम्म लाग्ने व्यापारीहरू बताउँछन् । यसले गर्दा नजिकएका चाडपर्वमा सामानको अभाव हुने जोखिम बढेको व्यवसायीहरू बताउँछन् ।