काठमाडौँ । जलनका बिरामी गणेश नेपालीको उपचारका क्रममा ज्यान गएको छ ।

मुगुको सोरु गाउँपालिका–१ का २५ वर्षीय नेपालीको वीर अस्पतालमा उपचारका क्रममा आज बिहान साढे ११ बजेतिर ज्यान गएकाे जिल्ला प्रहरी परिसर काठमाण्डौका प्रहरी उपरीक्षक पवनकुमार भट्टराईले जानकारी दिनुभयो । अस्पतालले भने अहिलेसम्म औपचारिक जानकारी दिएको छैन ।

यसअघि नेपालीकाे अवस्था चिन्ताजनक भएपछि तत्काल थप उपचारका लागि भारत नलैजाने निर्णय भएको थियो । सरकारले नेपालीका लागि हवाई उद्धार (एअर एम्बुलेन्स) को व्यवस्था गरेको थियो । त्यसअघि नेपालीको उपचारको सम्पूर्ण खर्च सरकारी कोषबाट व्यहोर्ने निर्णयसमेत भएको थियो ।

हिजो दिउँसो ३ बजे वीर अस्पतालको आकस्मिक कक्षमा भर्ना भएका नेपालीको शरीर ५५ प्रतिशतभन्दा धेरै भागमा जलन भएको थियो । वीर अस्पतालको प्लास्टिक सर्जरी विभागका संयोजक डा. पियुष दाहालकाे नेतृत्वमा युनिट प्रमुख डा. अपार लामिछाने, क्रिटिकल केअरका डा. निर्मण ज्ञवाली, एनेस्थेटिस्ट जयप्रकाश ठाकुर, प्रा. डा. रविराम श्रेष्ठ र नर्सिङ सेवाका स्वास्थ्यकर्मीसहित २१ जनाको विशेष टोली उपचारमा संलग्न हुनुहुन्थ्यो ।

नेपालीले हिजो राहदानी विभाग अगाडि पेट्रोल खन्याएर आफूलाई जलाउनुभएको थियो ।