मुस्ताङ भन्सारमा १५ दिनमै एक अर्ब ७८ करोड रुपैयाँ राजस्व सङ्कलन

मुस्ताङ भन्सारमा १५ दिनमै एक अर्ब ७८ करोड रुपैयाँ राजस्व सङ्कलन

काठमाडौँ । नेपाल–चीन उत्तरी कोरला नाका लोमान्थाङ–४ न्हेचुङमा रहेको मुस्ताङ भन्सार कार्यालयबाट १५ दिनमै एक अर्ब ७८ करोड ४४ लाख रुपैयाँ राजस्व सङ्कलन भएको छ ।

रसुवाको भोटेकोशीमा भदौ १० को बाढीबाट (रसुवागढी–केरुङ) नाका पूर्ण रूपमा बन्द भएसँगै मुस्ताङ भन्सार कार्यालयमा चीनबाट मालवस्तुको पैठारी बढेको छ । भन्सार प्रमुख बिदुर चुडालका अनुसार रसुवागढी–केरुङ नाका र सिन्धुपाल्चोकको तातोपानी नाका पूर्ण रूपमा बन्द भएपछि मुस्ताङको कोरला नाकाबाट चिनियाँ मालवस्तु पैठारीको क्रम बढेको हो ।

अस्ति शुक्रबार मात्रै मुस्ताङ भन्सार कार्यालयले २७ करोड ११ लाख राजस्व सङ्कलन गरेको छ । गएको भदौ २२ पछि मुस्ताङ भन्सारबाट दैनिक औसत ३० करोड हाराहारीमा राजस्व सङ्कलन हुने गरेको प्रमुख चुडालले जानकारी दिनुभयो ।

उहाँकाअनुसार रसुवागढी नाका बन्द भएपछि अस्ति शुक्रबारसम्म कोरला नाकाबाट नेपाल भित्रिएका ४३४ वटा कन्टेनर र ६४१ वटा विद्युतीय गाडीको भन्सार कार्यालयमा जाँचपास गराइएको छ ।

चालु आर्थिक वर्ष २०८३/८४ को साउनदेखि भदौ २५ गतेसम्म कोरला नाका हुँदै नेपाल भित्रिएका कन्टेनर र विद्युतीय गाडीको भन्सार जाँचपासबाट दुई अर्ब ३१ करोड ४४ लाख राजस्व सङ्कलन भएको तथ्याङ्क छ ।

२०८२ साल भदौअघि उपल्लो मुस्ताङका नागरिकका लागि मात्रै बाह्रै महिना खुला गरिएको कोरला नाका गएको वर्ष तातोपानी र रसुवागढी नाकामा बाढीपहिरो तथा नदी कटानले सडक अवरुद्ध भएपछि नेपाल सरकारले अघिल्लो वर्ष भदौ ३१ गतेदेखि कोरला नाकालाई वैकल्पिक रूपमा निकासी तथा पैठारी नाकाका रूपमा खुला गरेको थियो ।

भन्सार प्रमुख चुडालका अनुसार गएको आर्थिक वर्ष २०८२/८३ मा उत्तरी कोरला नाकाबाट भएको निकासी तथा पैठारीबाट मुस्ताङ भन्सारले ६ अर्ब ९२ करोडको राजस्व सङ्कलन गरेको थियो ।