काठमाडौँ । नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले प्रत्यक्ष कार्यकारी प्रमुखको एजेन्डा आफ्नो पार्टीले नछाडेको स्पष्ट पारेका छन्।

शनिबार रोल्पामा आयोजित चुनावी सभालाई सम्बोधन गर्दै उनले उक्त मुद्दा अझै अधूरो रहेको उल्लेख गर्दै निर्वाचनपछि संविधान संशोधनमार्फत पूरा गर्ने प्रतिबद्धता जनाए। “देश आज जहाँ पुगेको छ, त्यो हाम्रै संघर्ष र योद्धाहरूको बलिदानका कारण हो,” उनले भने, “हामी सुरुदेखि नै प्रत्यक्ष कार्यकारी प्रमुखको पक्षमा आवाज उठाउँदै आएका हौँ, त्यो एजेन्डा अझै बाँकी छ।”

प्रचण्डले पूर्ण समानुपातिक निर्वाचन प्रणालीप्रति पनि पार्टी अडिग रहेको बताए। हालको निर्वाचन प्रणाली खर्चिलो र महँगो भएको टिप्पणी गर्दै उनले पूर्ण समानुपातिक प्रणालीमार्फत आम नेपालीको अभिमतको सही प्रतिनिधित्व सुनिश्चित गर्न चाहेको उल्लेख गरे।

उनका अनुसार उक्त एजेन्डा कार्यान्वयन गर्न बाँकी रहेको र त्यसका लागि आगामी दिनमा पहल जारी रहनेछ।