रास्वपाद्वारा रासायनिक मल वितरणको अनुगमन, कोटा वृद्धि गर्न पहल गर्ने प्रतिबद्धता

रास्वपाद्वारा रासायनिक मल वितरणको अनुगमन, कोटा वृद्धि गर्न पहल गर्ने प्रतिबद्धता

नुवाकोट । राष्ट्रिय स्वतन्त्र पार्टी (रास्वपा) नुवाकोट जिल्ला सभापति रामेश्वर गजुरेलसहितको टोलीले कृषि सामग्री कम्पनी लिमिटेड, नुवाकोट शाखा कार्यालय तथा मल गोदामको अनुगमन गर्दै मल वितरण प्रणाली प्रभावकारी बनाउन सुझाब दिएका छन् ।

मंगलबार दिउँसो कार्यालयमा पुगेर सभापति गजुरेल सहितको टोलीले कार्यालय प्रमुख विज्ञान भट्टराईसँग नुवाकोटमा रासायनिक मलको आपूर्ति तथा वितरण अवस्थाबारे जानकारी लिएको थियो। टोलीले कृषि सामग्री कम्पनी लि.को मल गोदामको निरीक्षण समेत गरेको जनाएको छ।

अनुगमनका क्रममा नुवाकोटमा रासायनिक मलको माग उपलब्ध कोटाभन्दा झण्डै तीन गुणा बढी रहेकाले आपूर्तिमा चुनौती देखिएको जानकारी प्राप्त भएको रास्वपाले जनाएको छ। यद्यपि हालको वितरण प्रक्रिया सन्तोषजनक, व्यवस्थित र पारदर्शी रहेको पाइएको जिल्ला सभापति रामेश्वर गजुरेलले जानकारी दिनुभयो ।

अनुगमनपछि रास्वपा सभापति गजुरेलले मलको कोटा प्रदेशस्तरबाट निर्धारण हुने र त्यसपछि जिल्ला तथा पालिकास्तरमा बाँडफाँट गरिने भएकाले नुवाकोटका किसानको आवश्यकताअनुसार मलको कोटा वृद्धि गर्न सम्बन्धित निकायसँग पहल गर्ने प्रतिबद्धता जनाउनुभयो ।

अनुगमन टोलीमा जिल्ला सभापति रामेश्वर गजुरेल, उपसभापति कृष्णलाल श्रेष्ठ, जिल्ला सदस्य लक्ष्मी पाण्डे तथा प्रतिनिधिसभा सदस्य डा. अच्युतम लामिछानेको सचिवालयका तर्फबाट जितेन्द्र अर्याललगायत जिल्ला नेताहरुको सहभागिता रहेको थियो ।