ट्राफिक सप्ताह २०८३ अन्तर्गत नुवाकोटमा १५ चालकको लागू पदार्थ परीक्षण, २ जना पोजिटिभ भेटिए ।

ट्राफिक सप्ताह २०८३ अन्तर्गत नुवाकोटमा १५ चालकको लागू पदार्थ परीक्षण, २ जना पोजिटिभ भेटिए ।

नुवाकोट । जिल्ला ट्राफिक प्रहरी कार्यालय नुवाकोटले मनाइरहेको ‘ट्राफिक सप्ताह २०८३’ को पाँचौँ दिन लागू पदार्थ सेवन (लाप.से.) नियन्त्रण तथा सवारी दुर्घटना न्यूनीकरणलाई लक्षित गर्दै विशेष स्वास्थ्य परीक्षण कार्यक्रम सम्पन्न गरेको छ ।

आज शनिबार, तादी गाउँपालिका–३ खरानीटारस्थित इलाका प्रहरी कार्यालय खरानीटारको कार्यालय परिसरमा समुदाय–प्रहरी साझेदारी अवधारणा अनुरूप कार्यक्रम सञ्चालन गर्दा १५ जनाको परीक्षण गर्दा दुई जनाले लागू औषध प्रयोग (खाएको) पाइएको हो ।

उक्त कार्यक्रममा तादी आधारभूत अस्पताल खरानीटार, इलाका प्रहरी कार्यालय खरानीटार र स्थानीय निकायको समन्वयमा स्वास्थ्यकर्मी टोलीद्वारा काठमाडौँ–दुप्चेश्वर सडकखण्डमा सञ्चालन भइरहेका विभिन्न सवारी साधनका चालकहरूको लागू पदार्थ सेवन परीक्षण गरिएको थियो ।

तादी आधारभूत अस्पतालका डा. शिवानी रायमाझी सहितको स्वास्थ्यकर्मी टोलीको उपस्थितिमा गरिएको परीक्षणमा १५ जना चालकको नमुना जाँच गर्दा २ जना चालक लागू पदार्थ सेवन गरेको (Positive) पाइएको हो ।

पोजिटिभ देखिएका चालकहरूलाई आवश्यक थप कारबाहीका लागि जिल्ला प्रहरी कार्यालय नुवाकोट पठाइएको जिल्ला ट्राफिक प्रहरी कार्यालय नुवाकोटका प्रमुख विनोद ढकालले जानकारी दिनुभयो ।

ट्राफिक प्रहरीले यस्ता अभियानले सडक सुरक्षामा सुधार ल्याउने र मादक तथा लागू पदार्थ सेवन गरी सवारी चलाउने प्रवृत्तिलाई निरुत्साहित गर्ने अपेक्षा गरेको जनाएको छ ।