तारकेश्वरका शैक्षिक सँस्था आइतबार पनि खुल्ने, बैशाख २ देखि विद्यालय सुचारु हुने

तारकेश्वरका शैक्षिक सँस्था आइतबार पनि खुल्ने, बैशाख २ देखि विद्यालय सुचारु हुने

नुवाकोट । तारकेश्वर गाउँपालिकामा रहेका शैक्षिक सँस्थाहरु आइतबार पनि पूर्ववत रुपमा सञ्चालन हुने भएको छ ।

तारकेश्वर गाउँपालिका अध्यक्ष तथा गाउँ शिक्षा समिति संयोजक शिव अधिकारी (अविरल)ले गाउँपालिकाभित्रका शैक्षिक संस्थाहरूलाई आज चार बुँदे निर्देशन दिदै इन्धन अभावको कारण देखाई संघीय सरकारले आइतबार पनि सार्वजनिक बिदा दिएको सन्दर्भमा 'इन्धन अभावको प्रभाव प्रत्यक्ष नपर्ने' विश्लेषण सहित तारकेश्वर गाउँपालिका भित्रका विद्यालयहरु आइतबार पनि सञ्चालन गर्न भनिएको हो ।

अध्यक्ष अधिकारीले दिएको निर्देशन अनुसार संघीय सरकारले भर्ना अभियान र पठनपाठन सञ्चालनको लागी तोकिएको मिति बैशाख २१ भएपनि तारकेश्वरमा बैशाख २ गतेदेखि विद्यालय सुरु गर्न भनिएको छ । बैशाख २ मा नै विद्यालय सुचारु गर्ने भएपनि अध्यापन नभई अतिरिक्त गतिविधिहरु सञ्चालन गर्नको लागी अध्यक्ष अधिकारीले निर्देशन दिनुभएको हो ।

वैशाख २ गतेदेखि १५ गतेसम्म गाउँपालिकाभित्रका सबै विद्यालयले विद्यार्थीहरूका लागि यसअघि महिनामा एक दिन सञ्चालन हुँदै आएको 'बुक फ्री डे' मा सञ्चालन हुने कार्यक्रमहरूका साथै अतिरिक्त क्रियाकलापहरू, मनोरञ्जन र मनोपरामर्शका कार्यक्रमहरू, सीप विकासका कार्यक्रमहरू र योग ध्यानका कार्यक्रमहरू सञ्चालन अध्यक्ष अधिकारीले दिएको निर्देशनमा भनिएको छ ।

नयाँ शैक्षिक सत्रको वार्षिक शैक्षिक कार्यक्रमसहितको शैक्षिक क्यालेण्डर तयार भइसकेको अवस्थामा संघीय सरकारबाट सातामा दुई दिन बिदा दिने र वैशाख २१ गतेपछि मात्रै कक्षा सञ्चालन गर्ने नीति अख्तियार भएको सन्दर्भमा तारकेश्वर गाउँपालिका अध्यक्ष तथा गाउँ शिक्षा समिति संयोजक शिव अधिकारी (अविरल)ले गाउँपालिकाभित्रका शैक्षिक संस्थाहरूका लागि निम्नलिखित बुँदाहरूमा निर्देशन दिनुभएको हो । अध्यक्ष अधिकारीले दिनुभएको चार बुँदे निर्णयहरु निम्न अनुसार रहेको छ ।

१. पूर्वनिर्धारित तालिका अनुसार वैशाख २ गतेदेखि भर्ना कार्यक्रम सञ्चालन हुनुपर्नेमा संघीय सरकारको नीति अनुरुप वैशाख १५ गतेपछि मात्रै भर्ना कार्यक्रम सञ्चालन हुने भएकाले वैशाख २ गतेदेखि १५ गतेसम्म गाउँपालिकाभित्रका सबै विद्यालयले विद्यार्थीहरूका लागि यसअघि महिनामा एक दिन सञ्चालन हुँदै आएको 'बुक फ्री डे'मा सञ्चालन हुने कार्यक्रमहरूका साथै अतिरिक्त क्रियाकलापहरू, मनोरञ्जन र मनोपरामर्शका कार्यक्रमहरू, सीप विकासका कार्यक्रमहरू र योग ध्यानका कार्यक्रमहरू सञ्चालन गर्ने ।

२. सोही अवधिका बीचमा नयाँ शैक्षिक सत्रका लागि कार्ययोजना निर्माण गर्ने र प्रभावकारी शिक्षण क्रियाकलापका लागि शिक्षकहरू बीच सामूहिक छलफल र शैक्षणिक सीपको आदानप्रदानका कार्यक्रमहरू सञ्चालन गर्ने ।

३. वैशाख १५ गतेदेखि २१ गतेसम्म भर्ना कार्यक्रम र वैशाख २१ गतेदेखि नियमित पठनपाठन सुरु गर्ने ।

४. अहिलेकै अवस्थामा सातामा दुई दिन शिक्षण संस्था बन्द गर्दा विद्यार्थीहरूको पठनपाठनका लागि आवश्यक समय अपुग हुने देखिएकाले र संघीय सरकारको सातामा दुई दिन बिदा दिने निर्णयका पछाडि इन्धनको बचत पहिलो उद्देश्यका रुपमा देखिएको र गाउँपालिकाभित्र शिक्षण संस्था सञ्चालन हुँदा इन्धनको खपतमा थपिने भार नगन्य रहने भएकाले संघीय सरकारबाट नयाँ शैक्षिक कार्ययोजना सहित विस्तृत योजना आएको खण्डमा सोही अनुसार गर्ने तर यही अवस्थामा भने नयाँ शैक्षिक सत्रको पठनपाठन सुरु गर्न ढिला भएको १५ दिन र त्यसमाथि सातामा दुई दिन विद्यालय बन्द गर्दा विद्यार्थीहरूको शैक्षिक सिकाइ उपलब्धिमा गम्भीर क्षति पुग्ने देखिएकाले विद्यार्थीहरूको भविष्यप्रति जिम्मेवार हुँदै साताको एक दिन शनिबार मात्रै विद्यालय बन्द गर्ने । आइतबार भने विगतमा झैँ विद्यालय सञ्चालन गर्ने ।

यसैबीच, तारकेश्वर गाउँपालिकाको विद्यालयहरू बाहेक गाउँपालिकाभित्रका अन्य कार्यालयहरूको हकमा भने संघीय सरकारको नीति अनुरुप नै सातामा दुई दिन कार्यालय बन्द रहने र अन्य दिन बिहान ९ बजेदेखि बेलुकी ५ बजेसम्म कार्यालय सञ्चालन गर्ने अध्यक्ष अधिकारीले स्पष्ट पार्नुभयो ।

अध्यक्ष अधिकारीले यह बैशाख २ गतेदेखि नै पठनपाठन सुरु गर्न र आइतबार पनि विद्यालय सुचारु गराउन दिएको निर्देशन पूर्णतः कार्यान्वयन गर्न तथा गराउन गाउँपालिका शिक्षा शाखा र गाउँपालिकाभित्रका सबै विद्यालयका प्रधानाध्यापकलाई र सो अनुसार भए नभएको यकिन गर्न नियमित रूपमा विद्यालयहरूको अनुगमन गर्न गाउँ प्रहरीलाई निर्देशन दिइएको छ ।