काठमाडौँ । अबको ३-४ दिनभित्र मनसुन देशभर फैलिने सम्भावना रहेको मौसम पूर्वानुमान महाशाखाले जनाएको छ । 

मौसम पूर्वानुमान महाशाखाका अनुसार आउँदो मंगलबारसम्म गण्डकी र लुम्बिनी प्रदेशका बाँकी भागसहित कर्णाली र सुदूरपश्चिमको सम्पूर्ण क्षेत्रमा मनसुन विस्तार हुने सम्भावना छ । यस वर्ष सरदर मिति भन्दा ६ दिन ढिला गरी गएको असार ५ गते अर्थात् (जुन १९ तारिख)मा पूर्वमा प्रवेश गरेको मनसुन असार ८ देखि गण्डकी र लुम्बिनी प्रदेशसम्म पुगेको थियो । 

तर मनसुन कमजोर अवस्थामै छ । देशका बाँकी ठाउँमा अहिले पनि पश्चिमी वायु र स्थानीय वायुको आंशिक प्रभाव छ । पानी पर्न नसक्दा लुम्बिनीसहित पश्चिमको तराई क्षेत्रमा गर्मी बढेको छ । त्यस्तै धान रोपाइँ प्रभावित हुँदै आएको छ । आज कोशी प्रदेशको तराई तथा मधेस प्रदेशका केही, बागमती, गण्डकी र लुम्बिनी प्रदेशका तराईका एक/दुई ठाउँमा मेघ गर्जनसहित मध्यम वर्षा हुन सक्ने महाशाखाले जनाएको छ । 

कोशीका पहाडी तथा तराईका एक/दुई ठाउँमा ठूलो पानी पर्न सक्ने भएकाले सतर्क रहन पनि महाशाखाले आग्रह गरेको छ । आज पनि लुम्बिनी र सुदूरपश्चिम प्रदेशका तराई भागका थोरै ठाउँमा तातो लहरको सम्भावना छ ।