अध्यक्ष अधिकारीको निर्देशनपछि दाङसिङ–ढाँडाखर्क सडक मर्मत कार्य सुरु

अध्यक्ष अधिकारीको निर्देशनपछि दाङसिङ–ढाँडाखर्क सडक मर्मत कार्य सुरु

नुवाकोट । केही दिनअघि परेको अविरल वर्षाका कारण क्षतिग्रस्त बनेको दाङसिङ रयलछापस्थित प्रशासकीय भवनदेखि ढाँडाखर्कसम्मको सडकखण्डको मर्मत कार्य सुरु गरिएको छ ।

तारकेश्वर गाउँपालिकाको तल्लो भेगका तीन वडा र माथिल्लो भेगका तीन वडालाई जोड्ने मुख्य रणनीतिक सडक वर्षाका कारण अवरुद्ध भएपछि गाउँपालिका अध्यक्ष शिव अधिकारी (अविरल)ले तत्काल मर्मत गरी सवारी आवागमन सहज बनाउन प्राविधिक शाखालाई निर्देशन दिनुभएको थियो ।

अध्यक्षको निर्देशनलगत्तै आजदेखि सडक मर्मतको काम सुरु भएको गाउँपालिकाले जनाएको छ । मर्मत कार्य सम्पन्न भएपछि यस सडकमार्फत हुने आवागमन थप सहज हुने अपेक्षा गरिएको छ ।

यसैबीच अध्यक्ष अधिकारीले वर्षायाममा अवरुद्ध हुन सक्ने सबै मुख्य सडकको नियमित अनुगमन गर्न, आवश्यक मर्मत कार्य तत्काल अघि बढाउन तथा बाह्रै महिना सुरक्षित र सहज सवारी सञ्चालन सुनिश्चित गर्न प्राविधिक शाखालाई उच्च सतर्कतामा रही काम गर्न निर्देशन दिनुभएको छ ।