निर्वाचन सुरक्षा कडा: कोरला नाका तीन दिन पूर्ण रूपमा बन्द

निर्वाचन सुरक्षा कडा: कोरला नाका तीन दिन पूर्ण रूपमा बन्द

काठमाडौं । मुस्ताङको उत्तरी सीमामा पर्ने कोरला नाका आगामी प्रतिनिधिसभा सदस्य निर्वाचनलाई लक्षित गर्दै तीन दिनका लागि सिल गरिने भएको छ। सुरक्षा संवेदनशीलतालाई ध्यानमा राख्दै नेपाल–चीन सीमावर्ती आवागमन अस्थायी रूपमा रोक्न लागिएको हो।

कोरला नाका (लोमान्थाङ गाउँपालिका, मुस्ताङ) फागुन १८ गते राति १२ बजेदेखि फागुन २१ गते राति १२ बजेसम्म बन्द रहनेछ। जिल्ला प्रशासन कार्यालय मुस्ताङका अनुसार यस अवधिमा अत्यावश्यक सेवाबाहेक सबै प्रकारका आवागमनमा पूर्ण निषेध रहनेछ।

समुद्री सतहबाट करिब ४,६५० मिटर उचाइमा रहेको यस नाका क्षेत्रका स्थानीयलाई पनि सो अवधिमा बस्तीभित्रै बस्न अनुरोध गरिएको छ।

त्यस्तै, जोमसोम–कोरला ११० किलोमिटर सडकखण्ड पनि फागुन २० गते राति १२ बजेदेखि मतदान सम्पन्न नभएसम्म बन्द गरिने प्रशासनले जनाएको छ।