नुवाकोट । स्वास्थ्य तथा खाद्य स्वच्छता मन्त्रालयले बाढी प्रभावित नुवाकाेटमा हैजाविरुद्धकाे खोप पठाएको छ ।

मन्त्रालयले नुवाकोटका लागि ८० हजार ५२३ डाेज (२३ बक्स) हैजाविरुद्धको खोपसहित १० थान फ्रिज–फ्री भ्याक्सिन क्यारियर, ०.६ लिटर क्षमताका २२० थान आइस प्याक र ८ थान फ्रिज ट्याग पठाएको छ ।

मन्त्रालयले रसुवामा अस्ति आइतवार हेलिकप्टरमार्फत २१ हजार डाेज खोप पठाएकाे थियाे । साथै रसुवामा खोप अभियान पर्सि बिहीवारदेखि हैजाविरुद्धको खोप अभियान सञ्चालन हुँदैछ ।

बाढीका कारण खानेपानी तथा सरसफाइ प्रणाली प्रभावित हुँदा हैजा तथा अन्य पानीजन्य रोगको जोखिम बढ्न सक्ने भएकाले प्रभावित क्षेत्रमा सङ्क्रमण रोकथामलाई प्राथमिकतामा राखेर खोप अभियान सञ्चालन गर्न लागेको मन्त्रालयले जनाएको छ ।