नुवाकोट । सवारीसाधनको खराब अवस्था, समयमै सर्भिसिङ तथा मर्मत–सम्भार नहुँदा हुन सक्ने सवारी दुर्घटना र त्यसबाट हुने धनजनको क्षति न्यूनीकरण गर्ने उद्देश्यले नुवाकोटमा सवारीसाधनको प्राविधिक जाँच गरिएको छ।

जिल्ला ट्राफिक प्रहरी कार्यालय नुवाकोटको सक्रियतामा यान्त्रिक कार्यालय नुवाकोटका इन्जिनियरसहितको टोलीले बुधबार बेलकोटगढी नगरपालिका–५, कोल्पुटारस्थित गल्छी–मैलुङ सडकखण्डमा सञ्चालनमा रहेका विभिन्न सवारीसाधनको यान्त्रिक परीक्षण गरेको जिल्ला ट्राफिक प्रहरी कार्यालय नुवाकोटका प्रमुख प्रहरी निरीक्षक बिनोद ढकालले जानकारी दिनुभयो । उहाँको अनुसार जाँचका क्रममा ७ वटा बस, १० वटा टिपर, ७ वटा जिप, ४ वटा अटो, १० वटा ट्रक र ४ वटा एक्साभेटर गरी जम्मा ४२ वटा सवारीसाधनको प्राविधिक परीक्षण गरिएको हो ।

ट्राफिक प्रहरी प्रमुख, प्रहरी निरीक्षक बिनोद ढकालका अनुसार सवारी दुर्घटना न्यूनीकरणका लागि ट्राफिक प्रहरीले सञ्चालन गर्दै आएका विभिन्न सचेतनामूलक अभियानसँगै यो कार्यक्रम नयाँ पहलका रूपमा सुरु गरिएको हो। प्राविधिकमार्फत सवारीसाधनको वास्तविक अवस्था परीक्षण गरी सम्भावित जोखिम पहिचान गर्ने र समयमै मर्मत गर्न सवारीधनीलाई सचेत गराउने उद्देश्यले यस्तो अभियान सञ्चालन गरिएको उहाँले जानकारी दिनुभयो।

ट्राफिक प्रहरीले यस्ता प्राविधिक परीक्षण कार्यक्रमलाई आगामी दिनमा पनि निरन्तर सञ्चालन गर्दै सडक सुरक्षालाई थप प्रभावकारी बनाउने जनाएको छ।