तारकेश्वरमा जनप्रतिनिधि र कर्मचारीले बालबच्चा सामुदायिक विद्यालयमै पढाउनुपर्ने

तारकेश्वरमा जनप्रतिनिधि र कर्मचारीले बालबच्चा सामुदायिक विद्यालयमै पढाउनुपर्ने

नुवाकोट । तारकेश्वर गाउँपालिकाले सरकारी सेवा एंव सुविधा लिनेले आफ्नो सन्तानलाई अनिर्वाय रुपमा सामुदायिक विद्यालयमा नै पढाउनु पर्ने भएको छ ।

आज बुधबार बसेको गाउँ कार्यपालिकाको बैठकमा गाउँपालिका अध्यक्ष शिव अधिकारी ‘अविरल’ले गर्नु भएको प्रस्ताव सर्वसम्मत निर्णय भएसगैँ गाउँपालिका भित्रका जनप्रतिनिधि, कर्मचारी, शिक्षक, स्वास्थ्यकर्मी सहित सरकारी सेवा सुविधा उपभोग गर्दै आएका व्यक्तिका सन्ततीले अनिवार्य रूपमा सामुदायिक विद्यालयमा नै पढाउनुपर्ने भएको हो ।

अध्यक्ष अधिकारीको प्रस्तावलाई गाउँकार्यपालिका बैठकले सर्वसम्मत पारित गरेसगैँ यो निर्णय चालु शैक्षिक सत्रदेखि नै कार्यान्वयनमा आउने भएको छ ।

कार्यपालिका बैठकको निर्णयअनुसार गाउँपालिकाभित्रका सबै जनप्रतिनिधि, गाउँपालिका तथा मातहतका वडा कार्यालयका कर्मचारी, विद्यालयमा अध्यापन गराउदै आएका शिक्षक तथा कर्मचारी, स्वास्थ्य संस्थामा कार्यरत स्वास्थ्यकर्मी लगायतले आफ्ना सन्तानलाई अनिवार्य रुपमा सामुदायिक विद्यालयमा नै पढाउनुपर्ने भएको छ ।

गाउँपालिकाले सामुदायिक विद्यालयको शैक्षिक गुणस्तर सुधार गर्ने उद्देश्यसहित सर्वसम्मत रुपमा गरेको यस निर्णयले सामुदायिक विद्यालयको शैक्षिक गुणस्तर सुधार सहित सामुदायिक विद्यालय प्रतिको आकर्षण बृद्धि गराउन महत्वपूर्ण सहयोग पुग्ने विश्वास गरिएको छ ।

अध्यक्ष अधिकारीका अनुसार शिक्षा सुधार अभियानलाई प्रभावकारी बनाउने गाउँपालिकाको रणनीति योजना अन्तरगत उहाँले नै प्रस्ताव पेश गरेर कार्यपालिकाबाट सर्वसम्मत निर्णय भएको हो ।

निर्णयको प्रभावकारी कार्यान्वयन, अनुगमन तथा मूल्याङ्कनका लागि अध्यक्ष अधिकारीले सम्बन्धित शाखालाई आवश्यक निर्देशन समेत दिनुभएको छ ।