तारकेश्वरमा ५० लाखको धानबाली क्षतिपूर्ति कोषका लागि बजेट विनियोजन

तारकेश्वरमा ५० लाखको धानबाली क्षतिपूर्ति कोषका लागि बजेट विनियोजन

नुवाकोट । गत कार्तिक महिनामा भएको अविरल वर्षाका कारण धानबालीमा क्षति बेहोरेका कृषकलाई राहत उपलब्ध गराउन तारकेश्वर गाउँपालिकाले स्थापना गरेको रु. ५० लाखको धानबाली क्षतिपूर्ति कोषका लागि आवश्यक बजेट विनियोजन गरेको छ ।

गाउँपालिकाको गत पुस १६ गते बसेको गाउँ कार्यपालिका बैठकले ५० लाख रुपैयाँको धानबाली क्षतिपूर्ति कोष स्थापना गर्ने, तत्काल १० लाख रुपैयाँ कोषमा जम्मा गर्ने तथा बाँकी ४० लाख रुपैयाँ आगामी बजेटमार्फत व्यवस्थापन गर्ने निर्णय गरेको थियो ।

गाउँपालिका अध्यक्ष शिव अधिकारी ‘अविरल’ ले संकलित क्षतिको विवरणका आधारमा आगामी कात्तिक महिनाभित्र सबै प्रभावित किसानलाई क्षतिपूर्ति रकम उपलब्ध गराउने गरी आवश्यक प्रक्रिया अगाडि बढाउन कृषि शाखालाई निर्देशन दिनुभएको छ ।

गत कात्तिक ११ देखि १५ गतेसम्म परेको लगातारको वर्षाले खेतमै काटेर राखिएको धानबालीमा व्यापक क्षति पुगेको थियो । वर्षा रोकिएलगत्तै अध्यक्ष अधिकारीको निर्देशनमा गाउँपालिकाका प्राविधिक टोलीले सबै वडाका धान खेती हुने क्षेत्रको स्थलगत अनुगमन गरी क्षतिको यथार्थ विवरण संकलन गरेको थियो ।

वडा अध्यक्षहरू र प्राविधिक टोलीको समन्वयमा गरिएको अनुगमनबाट प्राप्त विवरणअनुसार करिब ७०० परिवारका किसान प्रभावित भएका छन् । गाउँपालिकाले सोही विवरणका आधारमा प्रभावित कृषकलाई यथोचित क्षतिपूर्ति उपलब्ध गराउने जनाएको छ ।