नुवाकोट, वैशाख २१ । तारकेश्वर गाउँपालिकाले आइतबारको सार्वजनिक बिदा तथा बिहान ९ बजेदेखिको कार्यालय समय प्रभावकारी नभएको निष्कर्ष निकाल्दै गाउँपालिका मातहतका सम्पूर्ण कार्यालयहरू पूर्ववत् रूपमा सञ्चालन गर्ने निर्णय गरेको छ ।

गाउँपालिका अध्यक्ष शिव अधिकारी (अविरल)को प्रस्तावमा बसेको गाउँ कार्यपालिकाको आकस्मिक बैठकले पर्सि मंगलबारदेखि लागू हुने गरी साताको ६ दिन कार्यालय सञ्चालन गर्ने तथा कार्यालय समय बिहान १० बजेदेखि बेलुका ५ बजेसम्म कायम गर्ने निर्णय गरेको हो ।

दुई साताको अभ्यास, सेवाग्राहीको सुझाव तथा कर्मचारीहरूको अनुभवका आधारमा गाउँपालिकाले तीन बुँदे निष्कर्ष निकालेको जनाएको छ । जसअनुसार बिहान ९ बजेदेखि १० बजेसम्मको समय ग्रामीण भेगका सेवाग्राहीका लागि अनुकूल नभएको, टाढा घर भएका कर्मचारीलाई दुई दिने बिदा र बिहानको समय असहज भएको तथा दुई दिने बिदाले इन्धन खपत घटाउनुको सट्टा बढाएको निष्कर्ष निकालिएको हो ।

गाउँपालिकाका अनुसार ग्रामीण क्षेत्रका सेवाग्राही बिहानको घरायसी काम सकेर कार्यालय पुग्नुपर्ने भएकाले १० बजेअघि सेवा लिन कठिन भएको देखिएको थियो । साथै, बिहान ९ बजेदेखि १० बजेसम्म कार्यालयमा सेवाग्राहीको उपस्थिति न्यून रहेको अनुभव गरिएको जनाएको छ ।

त्यस्तै, बाहिरी जिल्लाबाट आएका कर्मचारीहरूलाई दुई दिने बिदाले खासै सहुलियत नदिएको तथा बिहान ९ बजे कार्यालय पुग्नुपर्ने व्यवस्थाले दैनिक जीवन व्यवस्थापनमा समस्या भएको गुनासो आएको गाउँपालिकाले जनाएको छ ।

इन्धन खपत न्यूनीकरणका लागि लागू गरिएको दुई दिने बिदाले अपेक्षित परिणाम नदिएको गाउँपालिकाको निष्कर्ष छ । बिदाका दिन कर्मचारी तथा जनप्रतिनिधिहरू गाउँ बाहिर आवतजावत गर्दा इन्धन खपत झन् बढेको उल्लेख गरिएको छ ।

स्थानीय सरकार सञ्चालन ऐन, २०७४ को दफा १०२ अनुसार स्थानीय आवश्यकता, जनभावना तथा सेवा प्रवाहलाई मध्यनजर गर्दै निर्णय गरिएको अध्यक्ष अधिकारीले बताउनुभएको छ । उहाँले मंगलबारदेखि सोहीअनुसार सेवा सञ्चालन गर्न मातहतका सबै कार्यालय तथा निकायलाई निर्देशन समेत दिनुभएको छ ।

शिक्षा तथा स्वास्थ्य क्षेत्र भने यसअघि नै साताको ६ दिन सञ्चालन हुँदै आएका छन् ।