अपरेसन शिल्ड अफ जुडा’ पछि यदि इरानका तेल भण्डारहरूमा क्षति पुग्यो भने विश्व बजारमा तेलको अभाव भई मूल्य आकाशिन सक्छ। यसले अमेरिका र इजरायलले इरानको तेल उत्पादन क्षमतालाई नष्ट गर्ने कि केवल सैन्य अखडामा सीमित रहने भन्नेमा गम्भीर रणनीतिक दबाब महसुस गरेका छन्।

१७ फागुन, काठमाडौं । सन् २०२६ फेब्रुअरी २८ को बिहान जब तेहरानको आकाशमा इजरायली र अमेरिकी क्षेप्यास्त्रहरू बर्सिए, त्यसले केवल एउटा सैन्य आक्रमणको सङ्केत मात्र गरेन, बरु दशकौँदेखि सल्किएको मध्यपूर्वको आगो अझ फैलिएको पुष्टि गर्‍यो।

इजरायल र अमेरिकाको संयुक्त सैन्य अभियान ‘अपरेसन शिल्ड अफ जुडा’ ले इरानको सत्ता र सैन्य संरचनालाई हल्लाइदिएको छ। तर, यो बिन्दुसम्म आइपुग्न मध्यपूर्वले झन्डै आठ दशक लामो रगत र बारुदको इतिहास पार गरेको छ।

मित्रताको इतिहास (१९४८–१९७८) 

इजरायल र इरान सधैँ यति कट्टर शत्रु थिएनन्। सन् १९४८ मा इजरायलको स्थापना हुँदा त्यतिबेलाको पहलवी राजवंश भएको इरान इजरायललाई मान्यता दिने दोस्रो मुस्लिम राष्ट्र थियो।