नुवाकोट । विदुर नगरपालिका–५ स्थित वडा कार्यालय परिसरमा निर्माण हुन लागेको सुविधासम्पन्न तरकारी संकलन केन्द्रको नगरप्रमुख राजन श्रेष्ठले शिलान्यास गर्नुभएको छ। स्थानीय कृषकको उत्पादनलाई व्यवस्थित रूपमा संकलन, भण्डारण तथा बजारसम्म सहज रूपमा पु-याउने उद्देश्यका साथ उक्त केन्द्र निर्माण थालिएको हो।

शिलान्यास कार्यक्रममा विदुर नगरपालिकाकी उपप्रमुख प्रभा बोगटी, वडा नं. ५ का अध्यक्ष लिलानाथ न्यौपाने, वडा सदस्यहरू, कर्मचारी, स्थानीय कृषक तथा नगरवासी महानुभावहरूको उल्लेख्य सहभागिता रहेको थियो। कार्यक्रममा बोल्दै नगरप्रमुख श्रेष्ठले कृषकको उत्पादनलाई उचित बजारसँग जोड्न तथा कृषि क्षेत्रलाई थप व्यवस्थित बनाउन तरकारी संकलन केन्द्र महत्वपूर्ण हुने बताउनुभयो।

सघन शहरी तथा भवन निर्माण आयोजना मार्फत ठेक्का प्रक्रिया पूरा गरी निर्माण सुरु गरिएको उक्त केन्द्रमा दुई वटा भवन, पानी आपूर्ति प्रणाली र शौचालय सहितका आधारभूत पूर्वाधार रहनेछन्। किसानहरूले उत्पादन गरेको तरकारी सुरक्षित रूपमा संकलन, वर्गीकरण र बजार व्यवस्थापन गर्न सक्ने गरी केन्द्रलाई सुविधासम्पन्न बनाइने योजना रहेको वडा नं. ५ का अध्यक्ष लिलानाथ न्यौपानेले जानकारी दिनुभयो ।

करिब १ करोड ६० लाख रुपैयाँ लागतमा निर्माण हुने यस तरकारी संकलन केन्द्रको निर्माण कार्य आगामी जेठ मसान्तभित्र सम्पन्न गर्ने लक्ष्य राखिएको छ। केन्द्र सञ्चालनमा आएपछि विदुर नगरपालिका क्षेत्रका किसानहरूले उत्पादन गरेको तरकारी संकलन र बिक्री व्यवस्थापनमा सहजता हुने अपेक्षा गरिएको छ।

यसैबीच, विदुर नगरपालिकाले सघन शहरी तथा भवन निर्माण आयोजनासँग साझेदारी गर्दै विभिन्न विकास योजनाहरू सञ्चालन गरिरहेको छ। उक्त आयोजना मार्फत नगरपालिकाले करिब १६ करोड रुपैयाँ बराबरका कार्यक्रमहरू सञ्चालन गर्दै आएको छ।

यस अन्तर्गत वडा कार्यालय भवन निर्माण, सडक स्तरोन्नति, शौचालय निर्माण लगायतका विभिन्न पूर्वाधार विकासका योजनाहरू कार्यान्वयनमा ल्याइएको नगरपालिकाले जनाएको छ।

स्थानीय तहको समन्वय र सरकारी कार्यक्रममार्फत सञ्चालन भइरहेका यस्ता पूर्वाधार विकासका योजनाले स्थानीय स्तरमा सेवा प्रवाह सहज बनाउने र आर्थिक गतिविधि समेत विस्तार हुने अपेक्षा गरिएको छ।