अख्तियारमा १ वर्षमा ३३ हजारभन्दा धेरै उजुरी

अख्तियारमा १ वर्षमा ३३ हजारभन्दा धेरै उजुरी

काठमाडौँ । अख्तियार दुरुपयोग अनुसन्धान आयोगमा गएको आर्थिक वर्षमा भ्रष्टाचारसम्बन्धि सबैभन्दा धेरै उजुरी पालिकासँग सम्बन्धित परेका छन् । आर्थिक वर्ष २०८२/८३ को वार्षिक समीक्षामार्फत् अख्तियारले उजुरी, अनुसन्धान, मुद्दा फछ्र्यौटलगायतका तथ्यांक सार्वजनिक गरेको हो ।

गएको आर्थिक वर्षमा अघिल्लो वर्षबाट सरेर आएका ७ हजार ३ सय २३ र नयाँ दर्ता ३३ हजार ३ सय २८ गरी कुल ४० हजार ६ सय ५१ उजुरी थिए । त्यसमध्ये ३२ हजार ७ सय ९९ उजुरी फछ्र्यौट भएका छन् भने बाँकी ७ हजार ८ सय ५२ उजुरी चालू आर्थिक वर्षका लागि सारिएका छन् ।

आयोगको तथ्याङ्कले भ्रष्टाचारका उजुरीहरू सबैभन्दा धेरै पालिका अर्थात् स्थानीय तहसँग सम्बन्धित रहेका छन् । कुल उजुरीमध्ये ४८.९६ प्रतिशत स्थानीय तहका रहेका छन् भने सङ्घीय सरकारसँग सम्बन्धित ३८ प्रतिशत र प्रदेश सरकारसँग सम्बन्धित १३.०४ प्रतिशत छन् ।

प्रमुख आयुक्त प्रेमकुमार राईले उजुरी फछ्र्यौटमा उल्लेख्य प्रगति भए पनि अनुसन्धानको गुणस्तर अझै बढाउनुपर्नेमा जोड दिनुभएको छ ।